شكد خطيه.....................

سولفتلك عن قضيتي
وسولفتلك عن هواي
وانه جاي دخيل يمك مرضتني
وبوسه شفافك دواي
آخ يل طولك نهر عطشان اجيتك
كوم وتلكاني ماي
انه هل جاي اعترفلك
انه احبك
وانه بيك تولعت بأول صباي


انه جيتك مستحي غصبن عليه
لا ترد اجفوف اديه
ولا تفشل مستحاي
انه ذاك الجانت عيوني ضوه كمره جزيره
الهندس استفحل عليه
وبــــاك من عيني ضواي

وانه جان لواهسي واهس فراش
اليكضي كل وكته لعب
الجان مايهوه ويحب غير اللعب
الجان يغفه اعله الوردلمن يشوف الليل جـــاي


وانه جيت وبيدي خنجر
حتى من تكلي ماريدك بديه اذبح صفنتي
لصورتك بيهه عمر ما فاركتني
وبلكي اموت
وبلكي اموت
ولا اشوفن ضحكه الشامت رمح تفتر وراي


شكد خطيه
بيك افكر من طحت والتمت الوادم عليه
تصيح يمي الناس كلهه فلان مات
فلان مـــــــــــات
ولن يشيلوني على جنازه قديمه
شكثر بيهه ارواح موتى تواسي بيه
تباوع بوجهي وتكلي شكد خطيه


شكد خطيه
التموا اهلي وكل عمامي وديرتي سوّوا عراضه
واسمع البيرغ يرف فوك الجنازه
ولنهم يهوسون هوستهم عليه
مات ابنه شكد خطيه
مات ابنه شكد خطيه
شكـــد خطـــــــيه